PF HOUSE & 英曲大聯盟 - Powered by Discuz! Board

標題: 曲架黑仔的醫療失誤 [打印本頁]

作者: Hinckley 時間: 2008-10-16 04:28 AM 標題: 曲架黑仔的醫療失誤

【曲架黑仔的醫療失誤】

唔知大家仲記唔記得先前有個post關於「曲架黑仔尋家」,以下我所講的都是最近所發生的事,絕對令我氣憤。如果想了解更多關於Happy的背景，可到呢個Blog：
http://hk.myblog.yahoo.com/taro-dantongdau
記得初接Happy(即是黑仔)到我舖頭時的情況,他眼神顯得很恍,經過一段時間的照顧和調理,心情已顯得開朗,而身體亦沒有先前的瘦,曾經到我舖頭探望過Happy的網上朋友應該會更清楚(謝謝你們的心意)。我和太太亦幫Happy找到了新主人,想著Happy將來會有個幸福的下半生,點知不幸的事接種而來...
事情由八月尾新主人帶Happy去做body check開始。我地問過新主人帶去邊間檢查,佢地話帶去徐正雄,聽到呢個名,我地打了個突,並且同新主人講會否考慮其他診所,但佢地話以前家姐隻狗睇開。
當日body check完反來聽到個消息令我和太太心情沉重,報告結果顯示Happy患有心絲蟲、腸道寄生蟲和尿有晶石,當時醫生(我簡稱Dr.A)話先處理心絲蟲問題,並將要接受一個treatment。首先服食阿士匹靈，然後雖要打兩支針，呢兩支針需要留院，因隨時有生命危險，但徐正雄冇留院服務，我地曾建議新主人改去其他診所，但佢地唔聽。仲有我睇番個藥袋，發覺新主人已幫Happy改左第二個名，叫Kolby！
結果…treatment完左，再反去覆診，呢次呢位係另一個醫生(簡稱Dr.B)，佢驗出Happy的心絲蟲仲有，當日開左三種藥，我好強調係有三種藥，一種係治尿道石，另一種係胃藥，第三種係「犬心安5.0mg」，我和老婆都覺得奇怪，第一，Happy的尿道石係一個月前驗出，點解一個月後未再check過而開藥？第二，犬心安主要用於防心絲蟲，點解會開呢隻藥？我同老婆都再問過新主人，係唔係真係要同時食，佢地都話係，結果第日Happy開始出事，呼吸急促，忽冷忽熱，又痾又噁，身體更軟弱無力，Happy本身左盤骨已有問題，當晚亦因腳軟而滑倒，更傷了右腳我同老婆講叫新主人快快轉醫生驗查，但佢地一意孤行，仍堅持反去徐正雄覆診，我叫老婆呢次要一同去。到診所，呢位係Dr.A接見，我老婆已質問Dr.A，上次開的藥有冇問題，特別係犬心安，點解要開呢種藥，醫生冇正面回答，反而轉移話題講Happy隻腳，唔講由至可，一講就把幾火，醫生講話Happy隻腳可能係骨折，需做手術，我老婆已好嬲一句「得」埋去：「醫生我肯定Happy唔係骨折！」醫生又話可能係脫臼，如果我在場，我一定會反問番：「醫生！你做左X-光未，你又知係骨折？我係未讀過醫，但我知骨折係指一塊骨頭折開，脫臼係骨與骨之間的臼位移位，兩者同時都可見骨頭「條條fing」，但Happy免強仍可用右腳行。到最後醫生開左腸胃藥，我老婆堅持醫生要俾份病歷，萬一半夜有任何情況，我地都可第一時間帶去24小時急診，點知份病歷等左約15分鐘才到手，我都唔知診所用咩軟件，又唔知用邊種牌子的printer，print幾張紙要用咁耐時間，如果有機會，我想同醫生講，狗名係「Kolby Lee」，唔係「Kolbv Lee」。
過左一日，病情更嚴重，而且又唔食野，又痾又噁，到晚上便便已係水狀且有鮮血，我倆覺得事態緊急，已即時通知大契和新主人，在我們極力要求下，新主人才願帶Happy往其他診所睇急診…
Happy其間已轉過兩間診所，到現在我寫出成件事情時，Happy正在大圍診所的氧氣箱內「等死」，點解會咁，簡單講，因治療心絲蟲時所下的藥太重，心絲蟲不能一下子太過多的死亡，蟲屍會隨血管流動及塞血管，做成心臟或其他器官衰竭。

成件事上我真係好嬲：
點解新主人唔肯聽意見，一意孤行？好簡單道理，一個醫生睇唔好，點解唔轉個醫生，唔係話醫生醫術唔掂，而係可以俾個機會Happy。
點解徐正雄的病歷上完全冇提過「犬心安」呢種藥？
點解明知心絲蟲未清，仲要食呢種藥？大家不仿睇下包裝上的中文字。
>>犬心安
>>病歷表1
>>病歷表2
>>病歷表3
>>病歷表4

成件事情和病歷，我地曾詢問過旺角的Pets Central及荃灣享和，佢地話開呢隻藥係有問題和唔洽當。
直到今日，大圍的醫生同我地講，Happy的情況，能治愈的機會低過五成，最多觀察多兩三日，如果冇好轉，建議我地作一個「打算」。我其實都有心裡準備！

當初帶Happy出來，都希望有個好的將來，有時甚至我倆和大契夫婦都覺得帶佢出來好似害左佢！

我好多謝曾到過我舖頭或診所探過Happy的朋友，希望所有了解Happy的人能給予Happy精神上的支持或祝福，盼望未來兩日有好轉的機會。

[ 本帖最後由 Hinckley 於 2008-10-16 04:29 AM 編輯 ]

作者: p4uL1N3 時間: 2008-10-16 09:09 AM

唔好再嬲啦...e家最重要既係希望happy可以康復....鼓勵佢!

作者: fyf519 時間: 2008-10-16 09:32 AM

希望happy仔可以好得返啦!

作者: PHILIP 時間: 2008-10-16 09:53 AM

唉.. 都唔知點解徐正雄會攪到o甘..
8年前.. 我所以貓狗都係睇徐正雄 , 果時都好好.. 我對佢好有信心..
我隻西施fefe.. 果時都有心絲虫.. 都係一樣係首先服食藥,然後打兩支針,用左個幾月.. 終於好番

不過到左後來.. 徐正雄開始越來越差.. 唔知係唔係因為老左.. 攪到o甘.. 唉
反而dr.b 好有問題..邊有可能會有心絲虫果時俾佢食犬心安架.. 真係想整死佢o羊.. 唉
大家都係唔好再去徐正雄睇醫生了.. 真係幾恐怖..

希望happy無事啦.. 加油呀..
你都唔好怪自己啦.. 你都係想happy好先幫佢搵主人呢

作者: kanandy 時間: 2008-10-16 10:00 AM

Happy仔加油！你一定要好番呀

作者: Jeanis 時間: 2008-10-16 10:30 AM

0個兩個白痴固執戇居主人，唔該將0的犬心安自己食晒佢

香港而家咁多人有寵物，政府應該加強監管下獸醫行業，我地唔識隨時畀人昆，0的獸醫又賺大錢，錢仲事小，醫唔好先激氣

作者: Hinckley 時間: 2008-10-16 11:11 AM

徐正雄本人醫術好唔好我就唔清楚，但已退左休，診所只是掛住招牌名，診証的都是其他醫生。
我個人認為勁的診所唔需要下下四周賣廣告賣得咁衡。

現時的病情已去到，心臟發大，肺部有雜音，好多器官的血液開始形涸，再下去我唸大家都估到…
我同老婆，甚至大契爺大契媽都好心痛Happy，點解好好地一隻狗會有咁多問題，Happy係一隻好堅強的曲架，在元朗舊主人未搬走時，單靠佢地食剩掉在地上已發霉的冷飯菜汁、食草，日灑雨淋都未死得，傷左盤骨都仲可跳上跳落，但呢次真係好傷好傷，而且已冇氣力去「打呢場仗」，四五日冇野落肚，靠吊鹽水。
Happy其實仲有好多問題，除左心絲蟲，仲有聲帶附近的肌肉發炎、兩隻後腳的「印」帶已斷左，左盤骨移位，右腳關節炎，仲有椎骨生骨刺，Happy仔你真係好苦

作者: donaldduck_bb 時間: 2008-10-16 11:14 AM

HAPPY快0的冇事啦~~ 快0的好番出黎玩!!!

0的冇醫徳0既庸醫都唔知點續牌咖.. 香港唔係有獸醫協會咁0既物體監管0的獸醫咖咩???

作者: PHILIP 時間: 2008-10-16 12:54 PM

QUOTE:

原帖由 Hinckley 於 2008-10-16 11:11 AM 發表
徐正雄本人醫術好唔好我就唔清楚，但已退左休，診所只是掛住招牌名，診証的都是其他醫生。
我個人認為勁的診所唔需要下下四周賣廣告賣得咁衡。

現時的病情已去到，心臟發大，肺部有雜音，好多器官的血液開始形 ...

原來徐正雄已經無做呀.. o甘就更加唔好去啦..
唉.. 希望happy加油.. 快d好番啦.

作者: Sue 時間: 2008-10-16 02:28 PM

我聽後好難過

Happy 仔你要努力呀! 希望你打贏呢場仗 !!!!

作者: Jeanis 時間: 2008-10-16 03:15 PM

QUOTE:

原帖由 Hinckley 於 2008-10-16 11:11 發表
徐正雄本人醫術好唔好我就唔清楚，但已退左休，診所只是掛住招牌名，診証的都是其他醫生。
我個人認為勁的診所唔需要下下四周賣廣告賣得咁衡。

現時的病情已去到，心臟發大，肺部有雜音，好多器官的血液開始形 ...

作者: yip999 時間: 2008-10-16 03:27 PM

大圍珍..我隻囡果時都有睇過..不過因為我住九龍所以..比較唔方便...之後有次囡囡因為隻眼有病轉介了去太平到診所..之後就去呢間睇再無去大圍了.而我個囡囡都係向呢間診所離開左我...
其實獸醫診所...真係唔知邊間係好...間間都有人話好有人話唔好...所以有時都要睇多幾間...見下唔同既vet...同埋就算同一間診所都最好睇返同一個vet.....會跟得好d.........另外我都希望Happy 仔可以過到這一關....你要比佢知道好多人都關心既佢......

作者: Janice 時間: 2008-10-16 03:42 PM

雖然我無探過Happy 仔
不過睇完你編文章真係好唔開心
Happy 你要振作呀...打勝仗
我地支持你架

作者: steve1222 時間: 2008-10-16 09:59 PM

happpy仔你要加油呀!!

作者: HILL爸 時間: 2008-10-16 10:54 PM

happy仔振作呀,仲有好多人關心你架.

作者: mon 時間: 2008-10-17 01:40 AM

我哋做主人ga就一定信Vet,
但點解D vet可以咁無良,
主人仲可以信邊個?
唔通真係要學醫先可以養寵物?

作者: Hinckley 時間: 2008-10-17 04:26 AM

今日去左探Happy仔，佢終於可以離開氧氣箱，鹽水繼續需要吊，起碼精神好多，我地一行8人分批探望，而且今日有位網友整左d野食，Happy終於肯食野，我地都好開心，醫生曾經同我地講過話Happy的成數得五成或以下，病情沒有進展，但亦沒有惡化，本來我地都有心裡準備，但見今日的情況，個個都似打了支強心針，相信Happy呢刻都冇放棄，因此我地大細契都會盡一切努力，永不放棄，在此我好多謝各位曾探望Happy的網友，亦好多謝所有對Happy仔的祝福和關心。
另外我想講，當Happy仔好番，將由我和老婆&大契照顧，直到終老！
同埋我想強調，我之前所講的所有真實性，不怕天打雷擘！
我懇請各位，仍然在心中繼續支持我地和Happy仔！

作者: kanandy 時間: 2008-10-17 10:56 AM

Happy好叻仔

good boy

我每日都會為你祈禱！

作者: Irislam 時間: 2008-10-17 11:10 AM

衷心希望happy仔大步檻過~

作者: Sue 時間: 2008-10-17 12:20 PM

QUOTE:

原帖由 Hinckley 於 2008-10-17 04:26 AM 發表
今日去左探Happy仔，佢終於可以離開氧氣箱，鹽水繼續需要吊，起碼精神好多，我地一行8人分批探望，而且今日有位網友整左d野食，Happy終於肯食野，我地都好開心，醫生曾經同我地講過話Happy的成數得五成或以下，病 ...

好開心聽到呢個消息，Happy仔你要繼續努力企番起身，祝你早日康復，永遠快快樂樂!!!!

作者: tammy 時間: 2008-10-17 05:11 PM

好開心知道happy仔已經情况好轉，
希望佢能夠撑得住

俾心機happy仔

作者: donaldduck_bb 時間: 2008-10-17 07:55 PM

QUOTE:

happy仔, 要堅持呀!! 打贏呢場仗你以後就會更開心咖喇!!

作者: Hinckley 時間: 2008-10-17 11:18 PM

[mv]http://www.joyfulpets-house.com/Happy.wmv[/mv]
今日我雖然冇去探Happy，但我老婆拍了段短片。可見Happy仔精神好多，仲好肯食Peggy整的野食。
希望情況繼續有好轉！

[ 本帖最後由 Hinckley 於 2008-10-17 11:20 PM 編輯 ]

作者: Janice 時間: 2008-10-18 11:53 AM

QUOTE:

原帖由 Hinckley 於 10/17/2008 23:18 發表
[mv]http://www.joyfulpets-house.com/Happy.wmv[/mv]
今日我雖然冇去探Happy，但我老婆拍了段短片。可見Happy仔精神好多，仲好肯食Peggy整的野食。
希望情況繼續有好轉！

真係好啦Happy仔肯食嘢
佢仲好似好想出黎跟你地走咁
Happy他努力加油
好多人支持你呀

作者: Sue 時間: 2008-10-20 09:08 AM

最緊要佢肯食，食嘢才有氣力，Happy 仔有番精神，你好叻仔，努力呀!!! 快d 出院返屋企

作者: Irislam 時間: 2008-10-20 10:14 AM

happy仔, 乖乖地努力打勝呢場仗, 姨姨預左好多野食等你一齊出黎玩同比你食呀~

作者: PHILIP 時間: 2008-10-20 10:55 AM

加油加油.. happy仔你要加油呀..

作者: David 時間: 2008-10-20 10:24 PM

加油呀!!!要食多d嘢先有力打杖架

作者: Hinckley 時間: 2008-10-22 03:08 AM

係呢段日子裡面，我真係好多謝各位對Happy仔的關心和付出。
星期日早上，大契收到診所的電話，話醫生對Happy檢查過，當日可以出院，約我地下午5點到。我和大契到達左一陣，個護士姐姐帶左Happy到診症室門口，並開小小門隙俾Happy仔「裝」我地，佢一見到我地好開心咁走出嚟，當時我地見到Happy好精神，醫生叫我地一切入診症室再講。
呢次接手Happy的醫生係Dr.Tiger(呢間診所最有權威的)，Dr.Tiger話原來當初斷定Happy個病得兩成，估唔到呢刻各樣報告顯示Happy可以出院，Dr.話現時Happy的白血球仍偏高，血壓低至正常水平的最低點，得35指數，但紅血球指數不斷上升，即係話Happy個身體不斷康複，至於心絲蟲問題稍後再解決，現時先解決肺炎問題，Dr.仲話留院其間曾缺氧接近窒息的地步，到現在的情況係醫生和護士都估唔到的好，Happy的意志最令佢地鼓舞。
Dr.Tiger交帶落，Happy現在未算完全康複，需注意有否氣促、口唇變白，而且不能過度興趣，盡量令心臟的負擔減少，星期四再去見Dr.Tiger覆診。
聽醫生講完後便走得，我一拎出條狗帶，Happy仔即時眼大大咁望住，個樣好攪笑。星期一夜晚我留在舖頭陪Happy，見佢瞓得都幾好，我就冇得瞓，不過都值得，相信Happy好快可以同各位朋友見面！

[ 本帖最後由 Hinckley 於 2008-10-22 04:34 AM 編輯 ]

作者: Sue 時間: 2008-10-22 09:00 AM

好大嘅喜訊

等Happy身體完全康復，你要諗諗同佢攪個party慶祝吓

作者: PHILIP 時間: 2008-10-22 09:59 AM

QUOTE:

原帖由 Sue 於 2008-10-22 09:00 AM 發表
好大嘅喜訊

等Happy身體完全康復，你要諗諗同佢攪個party慶祝吓

係呀.. 好開心呀.. 希望我都可以見下happy啦..攪party啦.. ^^
其實我想知..happy主人現在點呢.. 希望佢可以好好照顧happy, 唔好再俾佢有無謂o既意外了.. 以後睇醫生真係要小心d.
始終決定狗狗一切o既都係主人.. 如果主人做得唔好.. 直接會影響到狗狗o既未來

作者: donaldduck_bb 時間: 2008-10-22 10:36 AM

QUOTE:

原帖由 Hinckley 於 2008-10-22 03:08 AM 發表
係呢段日子裡面，我真係好多謝各位對Happy仔的關心和付出。
星期日早上，大契收到診所的電話，話醫生對Happy檢查過，當日可以出院，約我地下午5點到。我和大契到達左一陣，個護士姐姐帶左Happy到診症室門口，並開 ...

好開心呀!! happy仔可以出院喇!! 你地大家都要俾心機呀!!! 呢段時期係辛苦0既~~ 好番就出黎玩番夠本慶祝!!

作者: Irislam 時間: 2008-10-22 10:38 AM

haha.........happy仔康復我地大家都會好happy啦

作者: Janice 時間: 2008-10-22 10:52 AM

下次有時間, 親自整d好好味ge野你食, happy仔要快d好返.遲d來探你得唔得?

作者: yip999 時間: 2008-10-22 03:51 PM

Dr.Tiger在大圍診所係最權威果個女vet...佢好難book 架...happy仔找到dr tiger 黎幫佢醫..真係一個好大既福氣..希望happy仔可以健健康康開開心心地生活落去...

作者: 忌廉媽咪 時間: 2008-10-22 06:47 PM

妖！睇完勁嬲....係人都知心絲虫藥係要確定冇心虫食ga啦...頂！

作者: PHILIP 時間: 2008-10-22 06:53 PM

QUOTE:

原帖由 忌廉媽咪 於 2008-10-22 06:47 PM 發表
妖！睇完勁嬲....係人都知心絲虫藥係要確定冇心虫食ga啦...頂！

現在happy好番就好了.. 不過除正雄果間真係唔好再去

歡迎光臨 PF HOUSE & 英曲大聯盟 (http://pfhouse.net/BBS/)